SON XƏBƏR

“Azərpoçt”un yeni sistemi pulları necə “yeyir”? - İşçilər işə düşüb

İyul 07
13:44 2019
"Respublika üzrə poçt şöbələrində sistemin hesabında günü-gündən süni surətdə rəqəmlərin artması halı müşahidə olunur… "Şişən”rəqəmlər aprel ayından müşahidə olunur. Tabeliyində olduqları quruma müraciət etsələr də, problemin hardan qaynaqlandığını hələ də üzə çıxaran olmayıb… Nəticədə isə poçt işçilərində belə fikir formalaşır ki, süni rəqəmlərin artması halı qurum rəhbərlərinin maraq dairəsindədir. Sistemin yenilənməsi adı altında poçt işçilərinin ciblərini talan edirlər”. 

Qlobal.az xəbər verir ki, "Azərpoçt” MMC-nin adının çəkilməsini istəməyən əməkdaşının azpolitika.info-ya verdiyi məlumatda belə iddia olunur.

Mənbənin sözlərinə görə, son illər ölkəmizdə informasiya və kommunikasiya texnologiyalarının inkişafına böyük diqqət yetirilsə də, 200 il yaşı olan 2 əsr tarixə malik poçtumuz təəssüflər olsun ki, süquta doğru gedir: 

""Biznesmen”lərin, "bankir”lərin apardıqları yenidənqurma adlı islahatlar nəticəsində və bank xidmətləri əsasında idarə olunan Azərbaycan poçtu həyəcan təbili çalır. Hamıya məlumdur ki, ən qədim tarixə malik olan poçtumuzun süqutu ölkənin tarixi köklərini sarsıdacaq”.

Bunun səbəbi olaraq isə, "Azərpoçt” MMC-də yeni sistemin tətbiq edilməsi və səlahiyyətli şəxslərin bundan öz məqsədləri üçün istifadə etməsi göstərilir: 

"Azərbaycanın poçt operatoru "Azərpoçt” MMC bu ilin mart ayının sonlarında korporativ informasiya sisteminin – "COLVİR Postal System” – CPS sisteminin yeni versiyasına qoşulub. Sistemin yeni versiyasına keçid "Azərpoçt”un əhaliyə göstərdiyi maliyyə xidmətləri üzrə işlərin optimallaşdırılması, proseslərin avtomatlaşdırılması, yeni tərəfdaşlarla daha sıx inteqrasiya edilməsinə imkan yaradılması məqsədilə həyata keçirilib.

Amma təəssüflər olsun ki, nəticə heç də ürəkaçan olmadı. Sistemin tez-tez donması va ya gün ərzində işləməməsi nəticəsində vətəndaşların poçt şöbələrindən haqlı narazılıqlarına və şikayətlərin artmasına gətirib çıxartdı. Nəticədə vətəndaşlar poçtlardan nə kommunal, nə də digər ödənişləri ödəyə bildilər. Bu hal, Bakı şəhəri üzrə demək olar ki, bütün poçtlarda müşahidə olunur. Hətta buna rayonlarda belə fəaliyyət göstərən poçtlarda da rast gəlmək mümükündür”.

Ancaq problem bununla bitmir. Mənbənin sözlərinə görə, "islahatlar” nəticəsində rabitəçilər "bank maxinasiya”sı ilə üzləşiblər: "Sistemin yenilənməsi nəticəsində "Azərpoçt”un keçmiş bazası iki hissəyə – maliyyə və poçt hissələrinə bölünüb. Mövcud infrastrukturu isə "Azintelecom”un "bulud” məkanına köçürülüb. Bunun gələcəkdə sistemin əhatə dairəsinin genişləndirilməsi və səmərəliliyin artırılması üçün böyük imkan yaradacağı bildirilib. 

Ancaq bunun əksinə rabitədə yeni problemlər meydana çıxıb. Şöbələrdə "COLVİR” sistemində problem cari ilin aprel ayından yaranmağa başladı. Bu problemlə poçt şöbələrində çalışan bütün əməliyyatçılar və şöbə rəisləri üzləşir, heç cürə yaxa qutara bilmirlər. Necə deyərlər, "işbazlar”ın qurduqları "bank maxinasiya”sı zavallı rabitəçiləri cana yığıb. Bu gün hamıya məlumdur ki, rabitə sektorunda çalışan, ən az maaş alan və ən çox qüruru tapdanan poçt işçiləridi. Bəs nədir onların günahı? Xalqına gecə-gündüz xidmət etməkmi?”

Verilən məlumata görə, sistemdə yaranmış (və ya qəsdən yaradılmış) problem müəyyən şəxslərin talançılığına şərait yaradır: "Respublika üzrə poçt şöbələrində günü-gündən sistemin hesabında süni surətdə rəqəmlərin artması müşahidə olunur. Günün sonu ödəniş qəbzlərini, kassadakı nəğd pulları və sistemdəki rəqəmləri müqayisə etdikdə məlum olur ki, sistemin hesabında rəqəmlər süni şəkildə artır. 

Rəqəmlərin belə "şişməsi” isə aprel ayından müşahidə olunur. Poşt şöbələri tabe olduqları quruma müraciət etsələr də, problemin hardan qaynaqlandığını hələ də üzə çıxaran olmayıb. Maraqlısı isə odur ki, bu problemin araşdırılıb üzə çıxarılması ilə aidiyyatı mütəxəssislər və işçilər məşğul olmur. Nəticədə isə poçt işçilərində belə fikir formalaşır ki, süni rəqəmlərin artması qurum rəhbərlərinin də maraq dairəsindədir. Sistemin yenilənməsi adı altında əslində poçt işçilərinin ciblərini talan edirlər. 

Mövcud problemin həlli yollarını tapa bilməyən poçt işçiləri isə sözün həqiqi mənasında "cana yığılıb”. Kassada nəğd pul vəsaiti yoxdur, amma sistemin hesabında pul günü-gündən, necə deyərlər "şişir”. Bununla bağlı respublika üzrə bir çox poçt şöbələri tərəfindən dəfələrlə "Azərpoçt” MMC-yə şikayətlər olunub. Hətta bu səbəbdən aralarında işdən çıxarılan günahsız şöbə rəisləri də var. Onlardan sistemdə suni şəkildə "şişən” rəqəmləri nəğd pul vəsaiti ilə ödəmələri tələb edilir. 

Zavallı poçt işçiləri arasında yenilənmiş sistem ucbatından hətta evlərindən belə olanlar var. Baş verən bu hadisələr insanda elə fikir yaradır ki, "COLVİR” sisteminin yeni versiyası günahsız poçt işçilərini, necə deyərlər, "şərləmək”, oğurluqda ittiham etmək məqsədilə yaradılıb”.

Mənbənin məlumatına görə, hazırda MMC-nin 1200-dən çox şöbə və filialı korporativ sistemə qoşulub: "Azərpoçt” geniş poçt şəbəkəsinə malikdir. Hazırda ölkə üzrə poçt şöbələrinin sayı təxminən 1500-ə yaxındır. "Azərpoçt” 2012-ci ilin aprel ayından Azərbaycan Mərkəzi Bankının lisenziyasına əsasən maliyyə xidmətləri də göstərməyə başlayıb”.

"Dövlətin əmlak maraqlarına mühüm zərərin vurulması hallarının, əsas qanun pozuntularının baş verdiyi otaqlardan biri də məhz "Azərpoçt”da maliyyə xidmətlərinin göstərildiyi "Xəzinə şöbəsi” otağıdır. Xarici valyuta mübadiləsinin alqı-satqısı və digər "maliyyə qazancları” bu şöbədə aparılır. Deyilənlərə görə, 1 saylı poçt filialının Müştəri Xidmətləri Şöbəsi pulların gəldiyi və yığıldığı əsas yerdir. Hətta həmin Müştəri Xidmətləri Şöbəsinin xəsinəsində 10 milyona yaxın pulun olması kimi informasiyalar yayılıb. Dövlətin və vətəndaşın pulu talanırsa, haqqı tapdalanırsa, buna göz yummamağı, lazımı dövlət orqanlarına şikayət etməyi bu ölkənin vətəndaşı kimi özümə borc bildim” – deyə mənbə bildirir.

Mənbə "Azərpoçt” MMC-də Prezidentin tapşırıqlarına da əməl edilmədiyini, struktur islahatları adı altında işçilərin ixtisar edildiyi bildirir: "Azərbaycanda struktur islahatlarının həyata keçirilməsi bütövlükdə Prezident İlham Əliyevin təşəbbüsü ilə ölkəmizdə reallaşan dərin islahatlar konsepsiyasının bir istiqamətidir. 

Bu islahatlar idarəçilyin mexanizminin təkmilləşdirilməsi və daha da yaxşılaşmasını nəzərdə tutur. Amma struktur islahatları heç bir halda işçilərin ixtisar edilməsini nəzərdə tutmur… 

Bunu ölkə başçısı da dəfələrlə vurğulayıb. Ancaq cənab Prezidentin verdiyi göstərişlərə və etdiyi çıxışlara "Azərpoçt”MMC tərəfindən əməl olunmur…. "Azərpoçt” MMC-də, onun tabeliyində olan idarə və poçt şöbələrində işçilərin ixtisar olunması, vətəndaşlara göstərilən xidmətin keyfiyyət və kəmiyyətinin həddən artıq aşağı olması, şikayətlərin çoxalması, idarəetmədə yol verilən ciddi nöqsanlar bundan xəbər vermirmi? Sizcə belə olan halda "Azərpoçt” MMC bir qurum olaraq Cənab Prezidentimizin verdiyi tapşırıqları və göstərişləri yerinə yetirirmi?”.



Oxşar xəbərlər

XƏBƏR LENTİ

Facebook