SON XƏBƏR

Qəbələdə icra hakimiyyəti meşə ərazisini satır, Ekologiya Nazirliyi isə susur (FOTO)

Oktyabr 21
23:17 2019
"Qəbələ rayonunda meşə əraziləri rayon icra hakimiyyətinin əməkdaşları tərəfindən satılır".

Bu barədə sakinlər aztoday.az-a məlumat veriblər.

Onların sözlərinə görə, Qəbələ rayon Vəndam meşəbəylinin 02 saylı dolayının 55-ci kvartalındakı meşə sahəsi fərdi evlər tikilmək üçün satılır. 

Qəbələ şəhərinə yaxın olan sözügedən əraziyə tamah salan məmurlar arasında İcra Hakimiyyətinin baş memarı Abdulxalıqov Təbriz Hüseyn oğlunun xüsusi fəallıq etdiyi bildirilir.

Rayonun torpaq şöbəsinin sabiq müdiri İslam Hacıyevin də Təbriz Abdulxalıqovla əlbir olduğu iddia edilir.

Sakinlərin sözlərinə görə, ərazidə fərdi evlər tikmək üçün torpaq sahəsi alanlara köhnə tarixlə, konkret 2007-ci ilə aid saxta sənədlər də verilir.

Sözügedən meşə ərazisində Təbriz Abdulxalıqovun yaxın qohumlarına da torpaq sahəsi verildiyi bildirilir. Ümumilikdə isə adıçəkilən ərazidə 20-dən çox şəxsə torpaq satılıb.

Bir müddət əvvəl şəhər sakinlərinin şikayətləri səbəbindən Vəndam meşəbəylinin 2 saylı dolayda tikinti işləri dayandırılsa da bu günlərdə yenidən intensiv şəkildə tikintiyə başlayıblar. Qəbələ rayon İcra Başçısının evi sözügedən əraziyə yaxın olduğuna görə, şənbə və bazar günlərində tikintiyə fasilə verildiyi də yayılan məlumatlar sırasındadır.

Sakinlərin dediyinə görə, Qəbələ rayon Meşə İdarəsi icra hakimiyyətinin meşə ərazisini qanunsuz satması faktına qarşı heç bir addım ata bilmir: "Meşə İdarəsi sözügedən ərazidə evlərin tikilməsinə dəfələrlə müdaxilə edib, tikintini dayandırmağa çalışsa da rayonun baş memarı Təbriz Abdulxalıqovun zəngindən sonra ərazidən uzaqlaşmalı olur”.

Məlumatda həmçinin qeyd olunur ki, İcra Hakimiyyəti Qəbələ şəhərinə yaxın olan meşə ərazisində çoxillik ağacları da məhv edib. 

Ekologiya və Təbii Sərvətlər Nazirliyi isə məsələyə münasibət bildirməyib. 

Qlobal.az
 





Oxşar xəbərlər

XƏBƏR LENTİ

Facebook