Rusiyanın 300 milyard dollarlıq akitvləri Ukraynaya veriləcək
Yanvar 11
16:30
2024
ABŞ Prezidenti Co Baydenin administrasiyası Rusiyanın Qərbdə dondurulmuş təxminən 300 milyard dollarlıq aktivlərinin müsadirəsinə icazə verən qanunu dəstəkləyir.
"AzPolitika.info” xəbər verir ki, bu barədə "Bloomberg” Milli Təhlükəsizlik Şurasının sənədinə istinadən xəbər verir. Vəsaitlərin Ukraynanın bərpasına yönəldilməsi planlaşdırılır.
ABŞ Milli Təhlükəsizlik Şurasının Senatın Xarici Əlaqələr Komitəsinə göndərdiyi sənəddə deyilir ki, administrasiya "prinsipcə” Rusiya vəsaitlərinin müsadirəsinə icazə verən qanunvericiliyi alqışlayır.
"Bloomberg” qeyd edib ki, Bayden, Konqresdəki respublikaçılar Kiyev üçün yeni yardım paketinin qarşısını aldıqdan sonra belə bir addımı dəstəkləmək qərarına gəlib.
Bundan əvvəl "Washington Post"un köşə yazarı Coş Roqin qeyd etmişdi ki, administrasiya Avropa ölkələrinin razılığı olmadan Rusiya Federasiyasının dondurulmuş aktivlərinin müsadirə edilməsi və Kiyevin maraqları naminə istifadə edilməsi planını həyata keçirə bilməyəcək. Çünki onların bəziləri indi belə bir addımın məqsədəuyğunluğuna şübhə ilə yanaşırlar.
Roqinin qiymətləndirməsinə görə, əgər Vaşinqton Kiyevin maraqları naminə dondurulmuş Rusiya aktivlərinin müsadirə edilməsinə razılıq versə, Konqresdəki respublikaçılar Ukraynaya kömək üçün əlavə vəsaitin ayrılmasını dəstəkləməyə daha çox meylli olacaqlar.
